Miljøpioneren Linda Eide fekk miljøprisen

Ein pioner innanfor miljøarbeid i spesialisthelsetenesta. Ho har spreidd den viktige miljøbodskapen med et høgt fagleg nivå og stort engasjement. Ho er den personen som kanskje har gitt mest for at vi som sektor er der vi er på miljøområdet.

Publisert 22.03.2019 / Sist oppdatert 23.02.2021

Prisvinnar Linda Karen Eide i midten. Juryleiar Ivar Eriksen til venstre og adm.dir. Herlof Nilssen i Helse Vest til høgre.

Dei gode orda hagla over prisvinnaren, Linda Karen Eide, som til dagleg er rådgivar ved seksjon Arbeidsmiljø og personalrådgiving ved Haukeland universitetssjukehus.

Prisen blei delt under den nasjonale miljø- og klimakonferansen for helseføretaka, som blei arrangert denne veka.

– Dette var veldig hyggelig og veldig uventa. Eg er blei svært overraska og glad for prisen. Det gir inspirasjon til vidare arbeid, seier prisvinnaren.

Linda Eide viser fram blomar og diplom ho fekk for miljøprisen. Foto. — Ein glad og overraska prisvinnar.

Ho fekk både blomar, diplom og eit kunstverk for sitt arbeid gjennom fleire enn 10 år med arbeidet med miljø. Ikkje berre på Haukeland, men over heile landet. I juryens grunngiving, heiter det blant anna:

Utdrag frå juryens grunngiving

Prisvinnaren har vore engasjert i miljøarbeid i spesialisthelsetenesta i ei årrekkje, også før miljø blei sett på dagsordenen nasjonalt. Fleire vil hevde at vinnaren har vore tonegivande og ein viktig aktør for den nasjonale satsinga vi har sett på området dei siste 10 åra.

Prisvinnaren er ein pioner innanfor miljøarbeid i spesialisthelsetenesta. Ho var sentral i arbeidet med ISO-sertifisering av Drifts/teknisk divisjon i Helse Bergen allereie i 2003, og ho har også leia fleire miljøsatsingar i Helse Bergen, og medverka til at føretaksleiinga har sett betydinga av å jobbe systematisk med miljøpåverknadane.

I perioden 2008-2016 har vinnaren leia sekretariatet for det nasjonale samarbeidsprosjektet Grønt sjukehus. Ho har reist land og strand over alt i Noreg og gitt fagleg tyngde til prosjektet, og medverka aktivt i arbeidet med innføring av miljøleiing og sertifisering etter ISO-standarden i føretak i alle regionar, langt utover det ein kan forvente i vanleg jobbsamanheng.

I tillegg har ho leia fleire viktige delprosjekt og halde mange innlegg på konferansar og samlingar. Ho har også alltid stilt opp for tillitsvalde og verneombod, og har spreidd den viktige miljøbodskapen med eit høgt faglig nivå og stort engasjement. Når alle landets helseføretak nå er ISO14001-sertifisert, har juryen lagt til grunn at det er ei god anledning å markere denne innsatsen med å gi prisen til den personen som kanskje har gitt mest for at vi som sektor er der vi er i dag på miljøområdet.

Det kom inn 13 forslag til miljøprisen for 2019, frå heile landet. Juryen var einstemmig på at Eide var ein klar vinnar. Juryen har bestått av tilsette i helseføretak, regionale helseføretak og representant frå tillitsvalde. Alle regionane har vore representerte i juryen og leiaren har vore Ivar Eriksen, eigardirektør i Helse Vest.

Linda Eide er på scena og får miljøprisen av juryleiar Ivar Eriksen. Foto. — Ivar Eriksen var leiar av juryen og delt prisen ut til Linda Eide på den nasjonale miljø-og klimakonferansen for helseføretaka, i Bergen.

Det viktigaste kriteriet for prisen er, etter vurdering frå juryen, at prisen skal vere ei påskjøning for ekstraordinær innsats utover det som er vanleg i jobbsamanheng og venta i stillinga.

Linda har leia prosjektet for det nasjonale samarbeidsprosjektet Grønt sjukehus, som no er avslutta. Men det gode arbeidet for miljø i sjukehus, både noverande og dei nye som er under bygging, held fram over heile landet.

Vi gratulerer Linda Karen Eide med miljøprisen for 2019!

Les også sak på helse-bergen-no