Helse Vest styrkjer sikkerheitspsykiatrien
Sikkerheitspsykiatrien i sjukehusa har vore under eit stort press over mange år. No styrkjer Helse Vest fagområdet.
– Talet på pasientar innanfor sikkerheitspsykiatrien held fram med å auke, men vi er ikkje godt nok rusta for å ta imot dei, og vi har ikkje nok kapasitet i føretaka. Ei styrking av dette fagområdet, for pasientar og medarbeidarar, er viktig og har høg prioritet i Helse Vest, seier Inger Cathrine Bryne, administrerande direktør i Helse Vest.
Dei siste åra har det vorte fleire pasientar med kombinasjonen alvorleg rusmisbruk og alvorleg psykisk sjukdom eller valdsproblematikk.
– Desse pasientane har ein alvorleg psykiatrisk sjukdom, dei utgjer ein fare for omgjevnadane grunna valdeleg åtferd, og dei har ofte store rusproblem. I tillegg er det eit jamnt og stort tal personar som blir dømt til psykisk helsevern, seier Ola Jøsendal, assisterande fagdirektør i Helse Vest.
Plan for styrking av tilbodet
Psykisk helsevern er eit stort satsingsområde for Helse Vest. I mars 2021 vedtok styret ein regional plan for styrking av fagområdet med inntil 20 millionar for 2021 og ytterlegare 20 millionar i 2022. I tillegg har dei fire helseføretaka utarbeida lokale planar for styrking av sikkerheitspsykiatrien.
– Føretaka planlegg å auke talet på døgnplassar, men like viktig er planane om å styrkje bemanninga og å etablere polikliniske og ambulante team. Så må vi bidra til at føretaka kan gjennomføre planane og styrkje fagområdet, seier Bryne.
– Målet er at både kvaliteten og kapasiteten i sikkerheitspsykiatrien har blitt vesentleg betre innan 2025, avsluttar Bryne.
Hovudpunkta i planane
Sikerheitspsykiatri
Sikkerheitspsykiatri er eit fagområde innanfor spesialisthelsetenesta som skal hjelpa pasientar som har ein alvorleg psykisk sjukdom, og som representerer ein risiko for seg sjølv eller andre gjennom valdeleg åtferd.
Dei sikkerheitspsykiatriske institusjonane tek òg vare på personar som blir dømde til tvungen psykisk helsevern. Fagområdet har einingar i spesialisthelsetenesta på nasjonalt, regionalt og lokalt nivå.