Språkplan for Helse Vest 2025-2035

Kort fortalt

• Eit klart og forståeleg språk byggjer tillit og bidreg til at vi bruker tida vår best mogleg. I tillegg lønner det seg økonomisk.
• Fleire lover forpliktar oss til å skrive klart og brukartilpassa.
• Føretaka i Helse Vest skal jobbe systematisk og målretta med skriftleg kommunikasjon, både internt og eksternt.
• Språkplanen presenterer hovudmålet for arbeidet, og tiltak for nå målet.
• Føretaka i Helse Vest skal prioritere språkopplæring av medarbeidarar, og å forbetre den skriftlege kommunikasjonen i pasientinformasjon, rekrutteringsarbeid og digitale tenester.
• Språkplanen er styrebehandla i Helse Vest RHF 18. desember 2024. Den er også behandla av direktørmøtet i Helse Vest 2. desember 2024.

Mål for språkarbeidet 

Målet for språkarbeidet er at føretaka i Helse Vest jobbar systematisk med språkarbeid, slik at vi får ein skriftleg kommunikasjon som bidreg til trygge og nære helsetenester, godt samarbeid og rett bruk av tida vår. Vi når målet gjennom å jobbe med dei prioriterte områda og tiltaka som er presenterte under Prioriterte område og tiltak nedanfor.

Prioriterte område og tiltak

Dette er hovudområda føretaka i Helse Vest skal jobbe systematisk med i språkarbeidet.

1. Pasientinformasjon 

Pasientinformasjon og andre viktige tekstar skal vere forståelege, tilgjengelege og heilskaplege, slik at mottakaren forstår og kan bruke informasjonen dei får. For å vite sikkert om tekstar fungerer etter hensikta, skal dei testast på dei aktuelle målgruppene.

Slik gjer vi det

• Vi skal kvalitetssikre og forbetre pasientretta tekstar og malar, for å sikre at innhaldet er oppdatert og følgjer klarspråksprinsippa.
• Nettsida i føretaket skal vere hovudkanalen for pasientinformasjon. Alt av 
  pasientinformasjon som kan vere felles nasjonalt, på tvers av føretak og regionar, skal vere felles. Vi skal ta i bruk nasjonale behandlingstekstar så langt det lèt seg gjere.
• Tekstar som blir brukte mykje, skal brukartestast på målgruppene så langt det lèt seg gjere.
• Det blir etablert ei felles, regional verktøykasse, som kan vere ei hjelp i arbeidet med å brukarteste tekstar.

2. Opplæring av medarbeidarar

Medarbeidarar skal vite om og følgje prinsippa i språkprofilen når dei skriv til pasientar og pårørande, medarbeidarar, potensielle medarbeidarar og eksterne samarbeidspartnarar. Alle som treng det, skal få tilbod om språkkurs og anna tilgjengeleg skrivehjelp.

Slik gjer vi det

Språkprofil og skriverettleiar for stillingsannonsar

• Medarbeidarar som har skriving som ein del av jobben, skal kjenne til språkprofilen og innhaldet i denne, og kan bruke han når dei skriv.
• Vi har ein felles skriverettleiar for stillingsannonsar. Medarbeidarar kan bruke
  skriverettleiaren som hjelpemiddel i arbeidet med rekruttering og stillingsannonsar.
• Kommunikasjonsavdelingane har eit særleg ansvar for å gjere språkprofilen og språkrettleiaren for stillingsannonsar kjent.

Skrivekurs

• Alle medarbeidarar med skriving som ein del av jobben skal få tilbod om skrivekurs i klarspråk og nynorsk. E-læringskurs i klarspråk skal vere tilgjengeleg i Læringsportalen.
• Klarspråk bør inngå i opplæringa av nye leiarar og leiarutviklingsprogram.
• Det skal utarbeidast eit felles, regionalt undervisningsopplegg, som kan brukast av føretaka i Helse Vest.

Ressurspersonar og systematisk språkarbeid

• Føretaka bør ha ein språkansvarleg person, avdeling eller ressursgruppe i språkarbeidet. Medarbeidarane bør ha ein person eller ei avdeling der dei veit dei kan ta kontakt om klarspråk.

Leiarar

• Leiarar skal ha tilgang til språkhjelp og -opplæring.

3. Spesiell tilrettelegging og universell utforming av tekst

Eit inkluderande språk respekterer mangfaldet i samfunnet, bidreg til likeverdige offentlege tenester og førebyggjer diskriminering. Skriftleg informasjon frå føretaka i Helse Vest skal vere forståeleg og tilgjengeleg for flest mogleg. Gjennom universell utforming skal vi ta omsyn til personar med ulike leseutfordringar, og personar med andre språk enn norsk som førstespråk. Målgrupper som har behov for ytterlegare språkleg tilrettelegging, skal få det. 

Ein del av målgruppene våre, både pasientar, pårørande og medarbeidarar, er minoritetsspråklege. Ved å bruke eit klart og mottakartilpassa norsk gjer helseføretaka det lettare for folk å lære seg språket vårt. I enkelte situasjonar er det nødvendig å omsetje tekstar til andre språk.

Slik gjer vi det

• Føretaka skal ha felles informasjon og opplæring tilgjengeleg på intranett om universell utforming av tekst i dokument og på nett.
• Det skal lagast ein felles regional plan for omsetjing av pasientinformasjon til engelsk og eventuelt andre språk i samarbeid med Felles nettløysing for spesialisthelsetenesta.

4. Rekruttering

Å behalde og rekruttere medarbeidarar er ei av hovudutfordringane våre framover. Vi lagar stillingsannonsar for mange ulike fagområde og yrkesgrupper. Stillingsannonsane som blir publiserte, skal vere skrivne i klarspråk, og byggje på språkprofilen.

Slik gjer vi det

• Vi har ein felles skriverettleiar for stillingsannonsar i Helse Vest (ligg på intranett).
• Det skal utarbeidast eit felles, regionalt skrivekurs til alle som skriv stillingsannonsar.

5. Digitale løysingar

Språket i dei digitale løysingane som blir brukte av medarbeidarar i sjukehusa, skal vere tydeleg og brukartilpassa. Klarspråk i digitale tenester er også avgjerande når pasientar og pårørande skal bli sjølvbetente og få ei god brukaroppleving. Klarspråk skal liggje til grunn når vi utviklar digitale tenester, frå prosjektoppstart til ferdig løysing.

Slik gjer vi det

• Rettleiaren om klart språk i utvikling av digitale tenester bør følgjast: Rettleiar om klarspråk i utvikling av digitale tenester | Digdir
• Språket i dei digitale løysingane bør brukartestast.
• Personar med kompetanse på klarspråk skal bidra i utviklinga av nye digitale løysingar