Topp fem risiko

Helseføretaka og det regionale helseføretaket i Helse Vest har definert fem felles, prioriterte område der vi alle set inn ekstra innsats for styring og reduksjon av risiko. Målet er å betre - og ta meir aktivt grep om - risikostyringa, og styrke regionalt samarbeid og læring.

Legemiddelområdet

Målet er å førebyggje at pasientar døyr eller blir alvorleg skada som følgje av legemiddelbehandling i Helse Vest. Hovudmerksemnda i dette arbeidet ligg på områda der det er størst fare for størst skade – og legemiddel og pasientgrupper som er forbundne med størst risiko.

Uønskt variasjon og prioritering

Framleis er det slik at kva spesialisthelsetenester pasientar får, i mange tilfelle kan vere avhengig av kvar dei bur. Helsetenesta gjer ulike vurderingar av like tilstandar. Dette fører til uønskt variasjon i ei teneste som har likskap som ein grunnlegjande verdi. Korleis kan ein redusere uønskt variasjon?

Behalde og rekruttere medarbeidarar

Det er ei sentral utfordring i helsetenesta på Vestlandet å behalde og rekruttere nok medarbeidarar med rett kompetanse. Om ein ikkje lukkast med dette vil dette gje utfordringar med å gi spesialisthelsetenester til befolkninga. Det er ei utfordring både å ha tilstrekkeleg tal medarbeidarar med spissa kompetanse og å behalde breddekompetansen som er nødvendig. Det er høgt sjukefråvær, og det må arbeidast med systematisk HMS arbeid for å løysa denne utfordringa.

Kvifor har vi topp fem risiko?

Å kjenne til ulike risikoar og korleis dei verker på verksemda i sjukehusa, er viktig for å nå måla våre og sørgje for god utvikling av tenestene, både for medarbeidarar og pasientar. Når vi kjenner kva risikoen er, kan vi gjere noko for å redusere han.

Formålet med topp fem risiko er å få eit betre og meir aktivt grep om risikostyringa, og på same tid legge til rette for styrkt regionalt samarbeid og læring på tvers av helseføretaka.

Metodikken

Metodikken er først å utarbeide faktagrunnlag og beskriving av pågåande arbeid. Vi veit mykje om kva utfordringane er og det skjer allereie mykje godt arbeid på desse områda. Likevel kan det vere behov for meir kunnskap og innsats for å ta ned risiko så mykje vi kan. Når vi har eit kunnskapsgrunnlag må vi gjere analyser og vurdere omfanget av kva risikoen inneber for medarbeidarar, leiarar og verksemda.

Når vi veit, må vi gjere tiltak og dele desse med andre helseføretak, anten vi lukkast med alt eller ikkje. Denne delinga er grunnlaget for læring og for at vi heile tida kan forbetre tiltaka. Ein viktig del av riskostyringa er at vi undervegs evaluerer og korrigerer, og aller helst i samarbeid med andre.