Brukar KI for å diagnostisere beinbrot
Helse Vest RHF inngår avtale med Philips for å kunne bruke KI i diagnostisering av beinbrot. Dette skal bidra til å ta ned ventetidene for pasientane.
I løpet av sommaren har Helse Stavanger prøvd ut kunstig intelligens (KI) som avgjerdsstøtte i diagnostisering av beinbrot. Det har vist seg å vere såpass god støtte for dei tilsette, at Helse Vest RHF har vedteke å innføre dette i alle sjukehusa i regionen. Etter å ha køyrt ein mini-konkurranse, inngår Helse Vest RHF no ein kontrakt med Philips som har KI-applikasjonen Boneview. Dette verktøyet skal bidra i det viktige i arbeidet med å redusere ventetida for pasientane.
– Eg er glad for at vi i Helse Vest kan ta i bruk kunstig intelligens innan radiologi i alle sjukehusa våre. Dette har vore høgt prioritert frå områdestyret og digitaliseringsstyret hos oss, uttaler Bjørn Egil Vikse, fagdirektør og områdeeigar pasientbehandling, Helse Vest RHF.
Foto: Jorunn Busk, Helse Vest RHF
Startar i Stavanger og Bergen
Boneview skal rullast ut i alle Helse Vest sine sjukehus, men arbeidet startar ved Stavanger universitetssjukehus og ved skadepoliklinikken på Haukeland universitetssjukehus.
– Vi har så vidt byrja og det er berre å gle seg til framhaldet og dei moglegheitene som vil opnast framover, seier ei fornøgd Siri Fagerheim, avdelingssjef ved røntgenavdelinga ved Stavanger universitetssjukehus.
Nasjonal rammeavtale gir moglegheiter
Sykehusinnkjøp HF har inngått ein nasjonal rammeavtale for KI-plattformer, noko som har gjort det mogleg for Helse Vest å få ei slik løysing på plass raskt.
– Framover vil det derfor gå enklare og raskare å få kopla opp tilsvarande verktøy, fortel Kristine Bø, leiar for delområde bilde i Helse Vest.
Det er ein viktig ambisjon i Helse Vest å kunne bidra til meir effektive tenester i sjukehusa. Eit innsatsområde som blir prioritert, er derfor trygg bruk av KI i pasientbehandlinga.
– Det er viktig at sjukehusa no tek dette i bruk og ser på korleis dei kan organisere seg best mogleg, slik at verktøyet avlastar helsepersonellet mest mogleg, avsluttar Vikse.
Kva er kunstig intelligens for klinisk bilettolking?
Kunstig intelligens (KI) for bilettolking er ein kombinasjon av programvare og maskinvare som er trena til å "sjå" og forstå medisinske bilete like godt, eller betre, som erfarne radiologar. Ved å trene opp algoritmar på store datasett med medisinske bilete kan KI-applikasjonar analysere og tolke bilete med ei høg grad av nøyaktigheit og effektivitet.
For å kunne bruke KI for klinisk bilettolking i Noreg, krevjast det at KI-applikasjonen er ferdig trena på relevante bilete (tilsvarande norsk demografi), og at han er CE godkjent. I tillegg må bruken av KI-applikasjonar følgjer reglane for medisinsk utstyr (MDR) når resultat blir brukte som beslutningstøtte i klinisk arbeid.