Målbilete: Krav til datakvalitet, integritet og tilgjengelegheit er vareteken i leverandøravtalar og mogleggjer bruk av og kontroll over alle relevante data
Foto: Colourbox
Oppdatert oversikt over krav til data
Vi stiller tydelege krav til data i anskaffingsprosessar og følgjer opp etterleving av krava. Vi har ein oppdatert og lett tilgjengeleg oversikt over krav til data som gir oss klare rammer gjennom heile anskaffingsprosessen. Krava er utforma for å møte behov for høg datakvalitet, integritet og tilgjengelegheit.
Krav til tilgjengelegheit, standardar og teknologi
Kravene dekkjer tilgjengelegheit av data og metadata, bruk av opne standardar, interoperabilitet, tilgang til ulike metodar for uttrekk av data, datakvalitet, personvern og informasjonstryggleik. I tillegg blir det stilt krav til bruk av moderne teknologi og verktøy for å støtte dataforvaltninga, som moglegheita til å hente ut datastrukturar og metadata til datakatalogen vår.
Nasjonal forankring
Dei viktigaste krava er nasjonalt forankra og integrerte i felles standardavtalar gjennom Sjukehusinnkjøp HF. Vi har nødvendig kompetanse for å sikre at leverandørane oppfyller avtalte standardar, vernar våre data, og varetek personvern.
KVA KAN VI GJERE?
NYTTE
Ved å stille tydelege krav til data i anskaffingsprosessen, legg vi grunnlaget for betre leverandøroppfølging. Det blir enklare å følgje med på ytinga til leverandørane/leveranse og sikre at dei oppfyller avtalen.
Dette gir oss ein betre føresetnad for å møte behova vi har for tilgjengelegheit og utveksling av data, høg datakvalitet, og god kontroll på personvern og informasjonstryggleik.
Dersom leverandøravtalane stiller tydelege krav til dokumentasjon av informasjons- og databasemodellar blir det lettare å følgje opp at leverandøren leverer dokumentasjonen vi treng.
Dokumentasjonen vil forenkle arbeidet med å hente ut data til integrasjonar og sekundærbruk som analyse, forsking og kunstig intelligens. Det vil til dømes gjere det lettare å finne og hente ut datafeltar sluttbrukar ser på skjermen som dei ønskjer å hente ut, noko som i dag kan vere svært krevjande.
RISIKO
Manglande eller uklare krav til data i leverandøravtalar kan føre til store økonomiske tap. Om vi i etterkant må be leverandøren om endringar eller tilgang vi ikkje har stilt krav om frå starten, kan dette medføre store uventa kostnader. Leverandørane kan krevje store summar for å komme behova i møte våre.
Utan god kontroll kan det også bli vanskeleg å oppdage avvik eller feil, som kan skade både omdømmet til organisasjonen og føre til økonomiske eller juridiske konsekvensar
Medisinsk utstyr blir levert med tilhøyrande programvare som Helse Vest ønskjer å hente data frå. Det kan til dømes vere for å få resultat direkte inn i pasientjournal eller kurve.
Leverandørar av medisinsk utstyr bruker ofte eigne dataformat og proprietære API-er. Det gjer det svært ressurskrevjande å lage integrasjonar. I nokre tilfelle er det ikkje mogleg å få til integrasjon i det heile, og då må data leggjast manuelt inn i pasientjournal eller andre fagsystem.
Om vi ikkje stiller krav til standardisert datadeling i anskaffinga, blir det ofte dyrt og vanskeleg å få dette til i etterkant.
