Vi tilrår at du alltid nyttar siste versjon av nettlesaren din.
Fagsenter for medisinske kvalitetsregister i Helse Vest
Fagsenter for medisinske kvalitetsregister i Helse Vest gir service til kvalitetsregister med nasjonal status og/eller regionale/lokale register forankra i Helse Vest.
Fagsenteret har ein regional funksjon og har kompetanse innanfor registeroppbygging og registeradministrasjon, jus, IKT, statistikk, analyse og kvalitetsforbetringsmetodikk, og gir bistand innanfor desse områda.
Fagsenteret er organisatorisk lagt til i Helse Bergen ved Forskings- og utviklingsavdelinga, og held til i Jonas Lies vei 68 ved Haukeland universitetssjukehus. Fagsenteret er, saman med andre regionale fagsenter, ein del av Nasjonalt servicemiljø for medisinske kvalitetsregistre.
Eit medisinsk kvalitetsregister samlar informasjon om utgreiing, behandling og oppfølging av pasientar innanfor definerte sjukdomsgrupper. Det er i dag 60 nasjonale medisinske kvalitetsregister i Noreg der 21 er forankra i Helse Vest.
Her finn du informasjon om relevant informasjon om medisinske kvalitetsregister, aktuelle skjema, malar og retningslinjer som du kan bruke i arbeidet med å etablere eit kvalitetsregister.
Kvalitetsforbetring av helsetenesta er hovudføremålet med dei medisinske kvalitetsregistera. Resultat frå kvalitetsregistera kan vise forskjellar i praksis mellom klinikkar og uønskt variasjon i kvalitet. Data frå kvalitetsregistera er viktige i arbeidet med kvalitetsforbetring.
Fagsenteret lyser ut stimuleringsmidlar til bruk av data frå kvalitetsregister i forbetring av helsetenesta. Midlane kan gå til kvalitetsforbetringsprosjekt eller forskingsprosjekt.
