Mange har tankar om sjølvmord i løpet av livet, og ein kan ha det utan å vere psykisk sjuk. Men blir tankane for tunge, treng ein hjelp. Behandling nyttar, og det er mange som kan og vil hjelpe.
Å snakke om sjølvmordstankar er som å skru på lyset i eit mørkt rom. Det vi trur skjuler seg i mørket, blir mindre farleg eller forsvinn. Det er hjelp å få, og det første steget er å tore å seie det vanskelege ordet sjølvmord. Det er til dømes ikkje slik at det blir fleire sjølvmord dersom vi snakkar om sjølvmordstankar. Det er ikkje farleg å spørje, men vi må vere førebudde på å tole å høyre svaret.
Saka er, som med alt anna, at det ofte blir betre når vi snakkar om det.
På denne sida finn du tips og råd til kva du skal sjå etter, korleis du kan ta den vanskelege samtala og kor du kan få hjelp.
Teikn på at ein person kan ha sjølvmordstankar
Mange har tankar om sjølvmord i løpet av livet, og du kan ha det utan å vere psykisk sjuk. Men blir tankane for tunge, treng ein hjelp. Behandling nyttar, og det er mange som kan og vil hjelpe.
Fareteikn kan vere at den det gjeld
- verkar tristare og endrar oppførsel
- kjenner seg verdilaus
- opplever å vere ei byrde for andre
- snakkar om at livet ikkje er verdt å leve
- manglar håp for framtida
- er uvanleg oppteken av døden
- brått fokuserer på økonomiske plikter som testament, forsikringar og lån
- bruker meir alkohol, medisinar eller narkotika enn før
- oppfører seg annleis enn før